Hatha-Yoga Pradipika - Chapter 1: Diet and Asana

alpa-dvāram arandhra-garta-vivaraṁ na-aty-ucca-nīcāyataṁ
samyag-gomaya-sāndra-liptam amalaṁ niḥśesa-jantūjjhitam |
bāhye maṇḍapa-vedi-kūpa-ruciraṁ prākāra-saṁve-ṣṭitaṁ
proktaṁ yoga-maṭhasya lakṣaṇam idaṁ siddhair haṭhābhyāsibhiḥ ||13||

evaṁ vidhe maṭhe sthitvā sarva-cintā-vivarjitaḥ |
guru-upadiṣṭa-mārgeṇa yogam eva sam-abhyaset ||14||

atyāhāraḥ prayāsaś ca prajalpo niyamā-grahaḥ |
jana-saṅgaś ca laulyaṁ ca ṣaḍbhir yogo vinaśyati ||15||

utsāhāt sāhasād dhairyāt tattva-jñānāś ca niścayāt |
jana-saṅga-parityāgāt ṣaḍbhir yogaḥ prasiddhyati ||16||

atha yama-niyamāḥ
ahiṁsā satyam-asteyaṁ brahmacaryaṁ kṣamā dhṛtiḥ |
dayā-ārjavaṁ mitāhāraḥ śaucaṁ ca-iva yamā daśa ||17||

tapaḥ santoṣa āstikyaṁ dānam īśvara-pūjanam |
siddhānta-vākya-śravaṇaṁ hrīmatī ca tapo hutam |
niyamā daśa samproktā yoga-śāstra-viśāradaiḥ ||18||

atha āsanam
haṭhasya prathama-aṅgatvād āsanaṁ pūrvam ucyate |
kuryāt tad āsanaṁ sthairyam ārogyaṁ cāṅga-lāghavam ||19||

vaśiṣṭha-ādyaiś ca munibhir matsyendra-ādyaiś ca yogibhiḥ |
aṅgīkṛtāny āsanāni kathyante kānicin mayā ||20||

jānu-ūrvor antare samyak kṛtvā pāda-tale ubhe |
ṛju-kāyaḥ samāsīnaḥ svastikaṁ tat pracakṣate ||21||

savye dakṣiṇa-gulphaṁ tu pṛṣṭha-pārśve niyojayet |
dakṣiṇe'pi tathā savyaṁ gomukhaṁ gomukhākṛtiḥ ||22||

ekaṁ pādaṁ tathaikasmin vinyased uruṇi sthiram |
itarasmiṁs tathā co-ruṁ vīrāsanam itīritam ||23||

gudaṁ nirudhya gulphābhyāṁ vyutkrameṇa samāhitaḥ |
kūrma-āsanaṁ bhaved etad iti yoga-vido viduḥ ||24||

padmāsanaṁ tu saṁsthāpya jānūrvor antare karau |
niveśya bhūmau saṁsthāpya vyomasthaṁ kukkuṭa-āsanam ||25||

kukkuṭāsana-bandha-stho dorbhyāṁ sambadya kandharām |
bhaved kūrmavad uttāna etad uttāna-kūrmakam ||26||

pādāṅguṣṭhau tu pāṇibhyāṁ gṛhītvā śravaṇāvadhi |
dhanur ākarṣaṇaṁ kuryād dhanur-āsanam ucyate ||27||

vām-oru-mūla-arpita-dakṣa-pādaṁ
jānor bahir veṣṭita-vāma-pādam |
pragṛhya tiṣṭhet parivartita-aṅgaḥ
śrī-matysa-nāth-oditam āsanaṁ syāt ||28||

matsyendra-pīṭhaṁ jaṭhara-pradīptiṁ
pracaṇḍa-rug maṇḍala-khaṇḍana-astram |
abhyāsataḥ kuṇḍalinī-prabodhaṁ
candra-sthiratvaṁ ca dadāti puṁsām ||29||

prasārya pādau bhuvi daṇḍa-rūpau
dorbhyāṁ pada-agra-dvitayaṁ gṛhītvā |
jānu-upari-nyasta-lalāṭa-deśo
vased idaṁ paścimatānam āhuḥ ||30||

iti paścimatānam āsana-āgryaṁ
pavanaṁ paścima-vāhinaṁ karoti |
udayaṁ jaṭharānalasya kuryād
udare kārśyam arogatāṁ ca puṁsām ||31||

dharām-avaṣṭabhya kara-dvayena
tat-kūrpara-sthāpita-nābhi-pārśvaḥ |
uccāsano daṇḍa-vad utthitaḥ khe
māyūram etat pravadanti pīṭham ||32||

harati sakala-rogān āśu gulm-odara-adīn
abhibhavati ca doṣān āsanaṁ śrī-mayūram |
bahu kadaśana-bhuktaṁ bhasma kuryād aśeṣaṁ
janayati jaṭharāgniṁ jārayet kāla-kūṭam ||33||

uttānaṁ śabavad bhūmau śayanaṁ tac-chavāsanam |
śava-āsanaṁ śrānti-haraṁ citta-viśrānti-kārakam ||34||

caturaśīty āsanāni śivena kathitāni ca |
tebhyaś catuṣkam ādāya sāra-bhūtaṁ bravīmy aham ||35||

siddhaṁ padmaṁ tathā siṁhaṁ bhadraṁ v-eti catuṣ.-tayam |
śreṣṭhaṁ tatrāpi ca sukhe tiṣṭhet siddhāsane sadā ||36||

atha siddhāsanam-
yoni-sthānakam aṅghri-mūla-ghaṭitaṁ kṛtvā dṛḍhaṁ vinyaset
meṇḍhre pādam atha-ikam eva hṛdaye kṛtvā hanuṁ susthiram |
sthāṇuḥ saṁyamitendriyo'cala-dṛśā paśyed bhruvor antaraṁ
hy etan mokṣa-kapāṭa-bheda-janakaṁ siddhāsanaṁ procyate ||37||

meṇḍhrād upari vinyasya savyaṁ gulphaṁ tath-oupari |
gulpha-antaraṁ ca nikṣipya siddhāsanam idaṁ bhavet ||38||

etat siddhāsanaṁ prāhur anye vajrāsanaṁ viduḥ |
muktāsanaṁ vadanty eke prāhur guptāsanaṁ pare ||39||

yameṣv iva mitāhāram ahiṁsā niyameṣv iva |
mukhyaṁ sarva-āsaneṣv ekaṁ siddhāḥ siddhāsanaṁ viduḥ ||40||

caturaśīti-pīṭheṣu siddham eva sadābhyaset |
dvāsaptati-sahasrāṇāṁ nāḍīnāṁ mala-śodhanam ||41||

ātma-dhyāyī mitāhārī yāvad dvādaśa-vatsaram |
sadā siddhāsanābhyāsād yogī niṣpattim āpnuyāt ||42||

kim anyair bahubhiḥ pīṭhaiḥ siddhe siddhāsane sati |
prāṇa-anile sāvadhāne baddhe kevala-kumbhake |
utpadyate nirāyāsāt svayam ev-onmanī kalā ||43||

tatha-ikāsminn eva dṛḍhe siddhe siddhāsane sati |
bandha-trayam anāyāsāt svayam evopajāyate ||44||

na-āsanaṁ siddha-sadṛśaṁ na kumbhaḥ kevalopamaḥ |
na khecarī-samā mudrā na nāda-sadṛśo layaḥ ||45||

atha padmāsanam-
vām-oru-upari dakṣiṇaṁ ca caraṇaṁ saṁsthāpya vāmaṁ tathā
dakṣ-oru-upari paścimena vidhinā dhṛtvā karābhyāṁ dṛḍham |
aṅguṣṭhau hṛdaye nidhāya cibukaṁ nāsāgram ālokayet
etad vyādhi-vināśa-kāri yamināṁ padmāsanaṁ procyate ||46||

uttānau caraṇau kṛtvā ūru-saṁsthau prayatnataḥ |
ūru-madhye tathottānau pāṇī kṛtvā tato dṛśau ||47||

nāsāgre vinyased rājad-anta-mūle tu jihvayā |
uttambhya cibukaṁ vakṣasy utthāpy pavanaṁ śanaiḥ ||48||

idaṁ padmāsanaṁ proktaṁ sarva-vyādhi-vināśanam |
durlabhaṁ yena kenāpi dhīmatā labhyate bhuvi ||49||

kṛtvā sampuṭitau karau dṛḍhataraṁ baddhvā tu padmāsanaṁ
gāḍhaṁ vakṣasi sannidhāya cibukaṁ dhyāyaṁś ca tac cetasi |
vāraṁ vāram apānam ūrdhvam anilaṁ protsārayan pūritaṁ
nyañcan prāṇam upaiti bodham atulaṁ śakti-prabhāvān naraḥ ||50||

padmāsane sthito yogī nāḍī-dvāreṇa pūritam |
mārutaṁ dhārayed yas tu sa mukto nātra saṁśayaḥ ||51||

atha siṁhāsanam-
gulphau ca vṛṣaṇasyādhaḥ sīvanyāḥ pārśvayoḥ kṣipet |
dakṣiṇe savya-gulphaṁ tu dakṣa-gulphaṁ tu savyake ||52||

hastau tu jānvoḥ saṁsthāpya svāṅgulīḥ samprasārya ca |
vyātta-vaktro nirīkṣeta nāsāgraṁ susamāhitaḥ ||53||

siṁhāsanaṁ bhaved etat pūjitaṁ yogi-puṅgavaiḥ |
bandha-tritaya-sandhānaṁ kurute cāsanottamam ||54||

atha bhadrāsanam-
gulphau ca vṛṣaṇasyādhaḥ sīvanyāḥ pārśvayoḥ kṣipte |
savya-gulphaṁ tathā savye dakṣa-gulphaṁ tu dakṣiṇe ||55||

pārśva-pādau ca pāṇibhyāṁ dṛḍhaṁ baddhvā suniścalam |
bhadrāsanaṁ bhaved etat sarva-vyādhi-vināśanam |
gorakṣāsanam ity āhur idaṁ vai siddha-yoginaḥ ||56||

evam āsana-bandheṣu yogīndro vigata-śramaḥ |
abhyasen nāḍikā-śuddhiṁ mudrādi-pavanī-kriyām ||57||

āsanaṁ kumbhakaṁ citraṁ mudrākhyaṁ karaṇaṁ tathā |
atha nāda-anusandhānam abhyāsa-anukramo haṭhe ||58||

brahmacārī mitāhārī tyāgī yoga-parāyaṇaḥ |
abdād ūrdhvaṁ bhavet siddho nātra kāryā vicāraṇā ||59||

susnigdha-madhura-ahāraś caturtha-aṁśa-vivarjitaḥ |
bhujyate śiva-samprītyai mitāhāraḥ sa ucyate ||60||

kaṭvāmla-tīkṣṇa-lavaṇoṣṇa-harīta-śāka-
sauvīra-taila-tila-sarṣapa-madya-matsyān |
ājādi-māṁsa-dadhi-takra-kulatthakola-
piṇyāka-hiṅgu-laśunādyam apathyam āhuḥ ||61||

bhojanam ahitaṁ vidyāt punar asy-oṣṇī-kṛtaṁ rūkṣam |
atilavaṇam amla-yuktaṁ kadaśana-śākotkaṁ varjyam ||62||

vahni-strī-pathi-sevānām ādau varjanam ācaret ||63||

tathā hi gorakṣa-vacanam-
varjayed durjana-prāntaṁ vahni-strī-pathi-sevanam |
prātaḥ-snānopavāsādi kāya-kleśa-vidhiṁ tathā ||64||

godhūma-śāli-yava-ṣāṣṭika-śobhanānnaṁ
kṣīrājya-khaṇḍa-navanīta-siddhā-madhūni |
śuṇṭhī-paṭola-kaphalādika-pañca-śākaṁ
mudgādi-divyam udakaṁ ca yamīndra-pathyam ||65||

puṣṭaṁ sumadhuraṁ snigdhaṁ gavyaṁ dhātu-prapoṣaṇam |
manobhilaṣitaṁ yogyaṁ yogī bhojanam ācaret ||66||

yuvo vṛddho'tivṛddho vā vyādhito durbalo-.pi vā |
abhyāsāt siddhim āpnoti sarva-yogeṣv atandritaḥ ||67||

kriyā-yuktasya siddhiḥ syād akriyasya kathaṁ bhavet |
na śāstra-pāṭha-mātreṇa yoga-siddhiḥ prajāyate ||68||

na veṣa-dhāraṇaṁ siddheḥ kāraṇaṁ na ca tat-kathā |
kriyaiva kāraṇaṁ siddheḥ satyam etan na saṁśayaḥ ||69||

pīṭhāni kumbhakāś citrā divyāni karaṇāni ca |
sarvāṇy api haṭhābhyāse rāja-yoga-phalāvadhi ||70||

iti haṭha-pradīpikāyāṁ prathamopadeśaḥ |

Quick Links

Prathamo Padeshah

chapter one

Page keywords:

Yoga teacher and Yoga Classes

Join Ronald Steiner on an expedition to Mt. Kailash

Next Workshops

New video at YogaEasy.de - Ashtanga Yoga for beginners